पत्रकारिताय् योगदान ब्यूपिन्त हःपाः कथं सिरपा लःल्हायेगु घोषणा
 |
| सिरपा चूलाकीपिं पत्रकारपिनिगु कोलाज किपा |
पत्रकारिताय् योगदान ब्यूपिन्त हःपाः कथं नेवाः पत्रकार राष्ट्रिय दबूलिं थीथी सिरपा लःल्हायेगु घोषणा याःगु दु । दबूया खुक्वःगु दँमुँज्याय् प्यम्ह पत्रकारपिन्त सिरपा बिइत्यंगु खः । पोहेलागा आमै सोमवाःकुन्हुच्वंगु सचिवालय मुँज्यां निर्णय यानाः मोफसलया छम्ह अले स्वनिगःया स्वम्ह पत्रकारपिन्त म्हतिं नगद झिद्वनाप सिरपा बिइत्यंगु दु ।
सिरपा चूलाकीपिं मध्ये रुकमणि श्रेष्ठं २००८ सालंनिसें पिदनाच्वंगु नेपालभाषाया 'थौंकन्हय्' नांया लय्पौयात सम्पादन यानाच्वनादीगु दु । मय्जु श्रेष्ठयात वाङमय शताव्दी पुरुष डा. सत्यमोहन जोशी पत्रकारिता सिरपा बिइगु तयारी याःगु दबूया नायः श्रीकृष्ण महर्जनं जानकारी बियादिल ।
अथेहे २७ दँ थुखय् निसें पत्रकारिताय् सक्रिय जुयादीम्ह राष्ट्रिय समाचार समितिया सम्पादक भाजु राजु शाक्ययात भिक्षु कुमार काश्यप स्मृति पत्रकारिता सिरपा लःल्हाइ । वय्कलं न बुद्ध धर्मनिसें पत्रकारिताया थीथी विधाय् च्वसू पिथनादीगु दु ।
ज्ञानदेवी स्मृति पत्रकारिता सिरपा धाःसा चितवनया पत्रकार इश्वर कुमार जोशीयात बिइत्यंगु दु । बीबीसी नेपाली सेवाय् दुथ्यानाच्वंम्ह जोशीं तकं पत्रकारिता ख्यलय् ताःनिसें योगदान बियाच्वंगु दु ।
अथेहे ४३ दँ थुखय् निसें निरन्तर फोटो पत्रकारिता यानाच्वनादीम्ह वरिष्ट फोटो पत्रकार नातिकाजि महर्जनयात बाबुराजा ज्यापु फोटो पत्रकारिता सिरपा बिइत्यंगु दु ।
देय्न्यंकंया नेवाः पत्रकारपिनिगु मंका संस्था, नेवाः पत्रकार राष्ट्रिय दबूया खुक्वःगु दँमुँज्या व विधान अधिवेशन वइगु माघ २६ गते शनिवाःकुन्हु येँया टेकुइ जुइत्यंगु दु ।
थप किपा स्वयादिसँ
No comments:
Post a Comment