नेपाल मै पहिलो पटक मिडिया फेस्टिभल हुने

नेपाल मै पहिलो पटक मिडिया फेस्टिभल हुने

केके मानन्धर, २८ मंसीर (9851086563)

आउँदो पुस २२ गते शनिबार मिडिया फेस्टिभल हुने भएको छ । समावेशी संचार तथा मातृभाषा पत्रकारिता  प्रबर्द्धनका  लागि आयोजित फेस्टिभलको लागि बिहिबार तयारी भेला बसेको हो । 

काठमाडौंको नेपाल पर्यटन बोर्डस्थित सभा हलमा सम्पन्न भेलाले नेवाः पत्रकार राष्ट्रिय दबू अन्तर्गतको सचिवालय समेत बनाएर जिम्मेवारी बाँडफाँड गरेको छ । मेला ललितपुरको दरबार क्षेत्रस्थित भण्डारखाल बगैंचामा हुँदैछ । संचार क्षेत्र सम्बन्धिका प्रतिनिधि, काठमाडौं, भक्तपुर, ललितपुर र काभ्रे जिल्लाका स्थानिय जनप्रतिनिधि, समाजसेवी, सरकारी पक्षसँगको समन्वयनमा कार्यक्रम गर्न लागेको छ ।

“संचार, संचारकर्मी तथा पत्रकारिता सम्बन्धिका सम्पूर्ण पक्ष समेतेर अन्तरक्रिया गर्दै यस क्षेत्रलाई थप सुदृढ बनाउनको लागि फेस्टिभल आयोजना गर्न लागेका छौं ।” मेला आयोजक समितिका संयोजक सुरेन्द्रभक्त श्रेष्ठले बताए । मेलामा संचारगृह तथा पत्रकारिता सम्बन्धिका विभिन्न आयामलाई देख्न, बुझ्न तथा अध्ययन गर्न सकिने उहाँको भनाई छ । 

बिहानै देखि शुरु भएर दिनभर हुने मेलामा फरक खालका संचार गृहका प्रदर्शनी स्टल, प्रकाशन गृहका पत्रपत्रिका, सांस्कृतिक प्रस्तुती हेर्न सकिने सह–संयोजक राजेश बज्राचार्यले बताए । मेलालाई थप आकर्षक तथा विशेष बनाउन पत्रकारिता सम्बन्धिका अध्ययन /अध्यापनका सामग्री उपलब्ध गराउने देखि फरक खालका संचारगृहमा आवद्ध संचारकर्मीहरुको अन्तक्र्रियालाई जोड दिने उनले बताए । 

हुन पनि नेपाल मै पहिलो पटक हुन लागेको यो मेलाले नेपाली संचार क्षेत्र बुझ्न चाहनेहरुका लागि कोशे ढुङ्गा सावित हुनेमा आयोजक संस्थाले दाबी गरेको छ । पत्रकार दबूले मेलाको लागि ईमेजकर्मी विराजकाजी राजोपाध्यायलाई स्टल व्यवस्थापन, केके मानन्धरलाई संचार, बुलेटिन तथा डायरीको लागि लहनाका प्रकाशक नृपेन्द्रलाल श्रेष्ठ तथा सांस्कृतिक पक्ष हेर्ने जिम्मेवारी सुरजवीर बज्राचार्यलाई दिएको छ । 

संचारकर्मीको पेशागत हकहित, श्रमजीवी पत्रकार ऐन लागु गराउने देखि संचार क्षेत्रको समग्र पक्षमा काम गर्दै आएको संस्था नेवाः पत्रकार राष्ट्रिय दबूले २५ जिल्लामा आफ्नो शाखा बिस्तार गरेको छ । राजधानी तथा जिल्लामा सक्रिय संचारकर्मीहरुलाई सहभागि गराइने कार्यक्रमको लागि १३ लाखको बजेट विनियोजन गरेको छ । मेलामा आम नागरिकहरुको बाक्लो उपस्थिति गराउने विषयमा पनि छलफल भएको थियो ।