नेवाः पत्रकार राष्ट्रिय दबूया तच्वःगु ध्यानाकर्षण, संघर्ष यायेगु ख्याच्वः

Source : नेवा: अनलाइन न्युज – ललेन्द्र शाक्य | २०७४ भाद्र २९, बिहिबार १४:११:३९ 

सरकारं सन्त नेता कृष्णप्रसाद भट्टराई राष्ट्रिय आमसंचार प्रतिष्ठान पलिस्था यायेत्यंगु बुखँ नेपाल आदिवासी जनजाति पत्रकार महासंघया छगू घटक व देय् न्यंकंया नेवाः पत्रकारपिनिगु राष्ट्रिय संगठन नेवाः पत्रकार राष्ट्रिय दबूया तच्वःगु ध्यानाकर्षण जूगु दु ।

दबूपाखें मूनायः श्रीकृष्ण महर्जन व मूछ्याञ्जे सुनिल महर्जनया ल्हाःचिं तयाः छगू प्रेस वक्तव्य पिथंसें थुगु खँया जानकारी ब्यूगु खः ।

वक्तव्यय् धयातःगु दु, ‘पत्रकारपिनिगु सीप व दक्षता अभिबृद्धि व अद्यावधिक यायेत राष्ट्रिय आमसंचार प्रशिक्षण प्रतिष्ठान पलिस्था यायेत्यंगुलिइ देय् न्यंकंया नेवाः पत्रकारपिनिगु राष्ट्रिय संगठन नेवाः पत्रकार राष्ट्रिय दबूपाखें सहर्ष लसकुस यानाच्वना । प्रतिष्ठानया पलिस्थां आमसंचार सम्बन्धि अध्ययन, अनुसन्धान व प्रशिक्षणपाखें पत्रकारिताया उच्चतम व्यावसायिक अभ्यास, पत्रकारिता पेशायात व्यावसायिक व मर्यादित यायेत ग्वाहालि याइगुलिं सुयानं निगूमत जुइफइ मखु ।’

भाद्र २९ गते पिथंगु उगु वक्तव्यय् २००८ सालय् पलिस्था जूगु नेपाल पत्रकार महासंघयात २०१२ सालय् हाकनं नीस्वनेधुंकाः नायः जुयादीम्ह कृष्णप्रसाद भट्टराईयात संस्थापक नायः नालाः भट्टराईया नामं प्रतिष्ठान नीस्वनेत्यंगु बुखँयात कयाः नेवाः पत्रकार राष्ट्रिय दबूया तच्वकं असहमति दूगु खँ प्वंकातःगु दु ।

वक्तव्यय् अथे असहमति प्वंकागु मुलुकया लोकतान्त्रिक आन्दोलनया अथक योद्धा, राजनीतिइ आदर्श व निष्ठाया पर्यायया रुपं च्वनादीम्ह सम्माननीय नेता मदुम्ह भट्टराईया अपमान यायेत्यनागु धाःसा पक्का नं मखूगु खँ न्ह्यथंसें मदुम्ह भट्टराई आधुनिक नेपाःया लोकतान्त्रिक चेतना, त्याग व जागरणय् सम्मानित व अनुकरणीय राजनेता जुयादीगु खँ नं न्ह्यथनातःगु दु । 

इतिहासया तथ्य चाःहीकाः जक सन्त नेता कृष्णप्रसाद भट्टराईया वास्तविक रुपय् सम्मान मजुइगु पत्रकार दबूया मूलभूत मान्यता जुइगु खँ न्ह्यथंसें वक्तव्यय् आमसंचार प्रतिष्ठान सम्मानित नेता भट्टर्राया नमय् नीस्वनेगु सरकराी तयारीप्रति तच्वकं आपक्ति प्वंकूसें महासंघया न्हापांम्ह संस्थापक नायः सत्यनारायण बहादुर श्रेष्ठया नामं राष्ट्रिय आमसंचार प्रतिष्ठान नीस्वनेत नेपाल सरकारयाके माग याःगु दु ।

लिसें उगु वक्तव्यय्   सत्यनारायण बहादुर श्रेष्ठ पत्रकार महासंघया संस्थापक नायः जूगु इतिहासया बंग्याइयात तत्काल भिंकेत नेपाल सरकार व नेपाल पत्रकार महासंघयाके पत्रकार दबुलिं माग यानातःगु दु ।

नेपाल पत्रकार महासंघया संस्थापकया विवादित विषय क्वमचायेकं सन्त नेता भट्टराइया नामं राष्ट्रिय आमसंचार प्रतिष्ठान नीस्वन धाःसा नेवाः पत्रकार राष्ट्रिय दबू उकिया विरुद्ध संघर्षय् क्वहां वयेगु ख्याच्वः उगु वक्तव्यय् बियातःगु दुसा उज्वःगु अवस्था मवयेमा धैगु पाखे फुक्कसिगु ध्यानाकर्षण याःगु दु ।