नेवाः पत्रकारत दबूया न्याक्वःगु दँमुज्याय् न्यागू पत्रकारिता सिरपाः लःल्हाइगु

Source :नेवा: अनलाइन न्युज – ललेन्द्र शाक्य | २०७४ भाद्र ११, आइतबार १६:२६:३५

‘व्यावसायिक व समावेशी पत्रकारिता ः नेवाः पत्रकारतय्गु क्रियाशीलता’ धइगु नारा थ्वयेका देय् न्यंकंया नेवाः पत्रकारतय्गु मंकाःगु संगठन नेवाः पत्रकार राष्ट्रिय दबूया न्याक्वःगु दँमुज्या/कार्यकारणी सभा वइगु भाद्र १७ गते याइगु जूगु दु । 

सासाः बैंक्वेय्ट टेकुइ जुइगु उगु ज्याझ्वलय् स्वनिगः नापं स्वनिगः पिनेया थीथी जिल्लाया प्रतिनिधितय्सं नं ब्वति काइगु जूगु दु । लुमन्ति पौ तकं पितब्या याइगु न्याक्वःगु दँमुज्याया लसताय् न्याम्ह नेवाः पत्रकारपिन्त थीथी नगद नापं सिरपाः बिया हनेज्या याइगु जूगु दु । 

ज्याझ्वलय् वाङमय शताब्दी पुरुष डा. सत्यमोहन जोशी पत्रकारिता सिरपाः, ज्ञानदेवी स्मृति पत्रकारिता सिरपाः, पुरुषोत्तम–निरा पत्रकारिता सिरपाः, भिक्षु कुमार काश्यप स्मृति पत्रकारिता सिरपाः, बाबुराजा ज्यापु फोटो पत्रकारिता सिरपाः लःल्हाइगु जूगु दु । 

नेवाः पत्रकारतय्गु नितिं कल्याणकारी कोषया तकं घोषणा यायेगु ज्या जुइ धकाः ग्वसाः खलः नेवाः पत्रकार राष्ट्रिय दबूपाखें जानकारी बिउगु दु । 

अथेहे उगु ज्याझ्वलय् नेवाः पत्रकार राष्ट्रिय दबूया आधिकारिक वेभसाइट शुभारम्भ याइगु जूगु दु । येँ महानगरपालिकाया मेयर विद्यासु्न्दर शाक्यया मूपाहांसुइ जुइगु उगु ज्याझ्वलय् नेपाल पत्रकार महासंघया न्हू निर्वाचित जुयादीपिं केन्द्रीय पदाधिकारी नापं जनजाति केन्द्रीय सदस्यपिन्त हनेज्या नं याइगु जूगु दु ।