च्यागू बुँदाया येँ घोषणापत्र जारी यासें क्वचाल अन्तर्राष्ट्रिय मातृभाषा पत्रकारीता सम्मेलन
नेपालभाषां मातृभाषा पत्रकारिता सुरु जूगु सछिदँ क्वंगु लसताय् नेवाः पत्रकार राष्ट्रिय दबूया ग्वसालय् जूगु न्हापांगु अन्तर्राष्ट्रिय मातृभाषा पत्रकारिता सम्मेलन म्हिगः ‘येँ (थिमि) घोषणापत्र’ जारी यासें क्वचाल ।
शनिवाः यलया स्टाफ कलेजय् पुलांम्ह राष्ट्रपति विद्यादेवी भण्डारीं त्वाःदेवा च्याकाः उगु सम्मेलनया उलेज्या यानादीगु खःसा समापन ज्याझ्वलय् उपप्रधानमन्त्री नारायणकाजी श्रेष्ठ मूपाहां कथं झाःगु खः । निन्हुयंकं जूगु सम्मेलनया म्हिगः निन्हु कुन्हु ‘मातृभाषा पत्रकारिताय् राज्यया दायित्व’ विषयय् सहलह जूगु खःसा धर्मादित्य धर्माचार्यया छय् सिर्जना नेवाःपाखें धर्मादित्यलिसे सम्बन्धित ज्वलंत प्रस्तुत यानादीगु खः ।
ज्याझ्वः लिपा च्यागू बुँदाया ‘येँ (थिमि) घोषणापत्र’ जारी यासें सम्मेलन समापन याःगु खः । घोषणापत्रया न्हापांगु बुँदाय् नेपालय् न्हापांखुसी मांभासं पत्रकारिता शुरु यानादीम्ह धर्मादित्य धर्माचार्यया बुन्हियात अन्तर्राष्ट्रिय मातृभाषा पत्रकारिता दिवस घोषणा यायेमाःगु माग यानातःगु दु ।
म्हीग ज्याझ्वःया उलेज्या यानादिसें पुलांम्ह राष्ट्रपति भण्डारीं नेपाःया थीथी मांभाय् नेपाःया तिसा खः धासें पत्रकारिता मार्फत थुकिया संरक्षण जुइमाःगु बिचाः तयादिल । ज्याझ्वलय् भण्डारीं भाषा आयोगय् दुजः नियुक्त जुयादीम्ह सुरेश मानन्धर व गुथि संस्थानय् गुथि विधेयक तयार यायेत दयेकूगु समितिया संयोजक किरण शाक्ययात सुभाय् पौ लःल्हानादीगु खःसा येँ महानगरपालिकाया पुलांम्ह मेयर विद्यासुन्दर शाक्य व नेवाः अभियन्ता नेवाः पत्रकार राष्ट्रिय दबूया संस्थापक नायः श्रीकृष्ण महर्जनयात हनापौ लःल्हानादीगु खः । ज्याझ्वलय् नेवाः पत्रकार राष्ट्रिय दबूया ख्वापौ ‘आज्जु’ विमोचन नं विमोचन जूगु खः ।
ग्वसाः खलः नेवाः पत्रकार राष्ट्रिय दबूया नायः नृपेन्द्रलाल श्रेष्ठया सभापतित्व व सुरेन्द्रभक्त श्रेष्ठया संयोजनय् जूगु सम्मेलनया उलेज्या समारोहय् भारतया अनिरुद्र सुन्दासं नं भिन्तुना देछानादीगु खः । न्हापांगु न्हि कुन्हु पुष्करभक्त माथेमा, सहयोग रंजित व वर्षापाखें ज्यापौ न्ह्यब्वयादीगु खःसा राजु लामा, कविता श्रेठ व पूर्णभक्त दुवालपिसं थीथी विषयया स्वंगू सेसन चले यानादीगु खः । म्हिगः मध्यपुर थिमिइ जूगु ज्याझ्वलय् मध्यपुर थिमि नगरपालिकाया मेयर सुरेन्द्र श्रेष्ठं सार्क जर्नालिष्ट फोरमपाखें झाःपिं मातृभाषा पत्रकार पाहांपिंत लसकुस यानादीगु खः । घोषणापत्रय् नेवाः राष्ट्रिय पत्रकार दबूया नायः नृपेन्द्रलाल श्रेष्ठ, सार्क जर्नालिजम् फोरमया अध्यक्ष राजु लामा, फोनिजया नायः गजुरधन राई, सार्क जर्नालिजम् फोरमया महासचिव एमडी अब्दुल रहमान, सार्क जर्नालिजम् फोरम भारतया अध्यक्ष सुधांशु अनिरुद्ध व भूटान पत्रकार संघया दुजः किन्ले डेमपिंसं हस्ताक्षर यानातःगु दु ।
येँ घोषणापत्रया च्यागू बुँदा
१) नेपालय् न्हापांखुसी मातृभाषा पत्रकारिता शुरु यानादीम्ह न्हापांम्ह पत्रकार धर्मादित्य धर्माचार्यया बुन्हियात ‘अन्तर्राष्ट्रिय मातृभाषा पत्रकारिता दिवस’ घोषणा यायेमाः ।
२) मांभाय्, भाय्या सम्पदा, लोप जुइत्यंगु भाषाया संरक्षण, आदिवासी ज्ञानया संरक्षण, सीप व प्रविधिया रक्षा यायेगु लागिं मातृभाषा पत्रकारिताया प्रवद्र्धन यायेगु जुइ ।
३) थःगु मांभासं सूचना काये फइगु व अभिव्यक्ति याये दइगु अधिकारया सुरक्षा यायेगु लागिं मातृभाषा पत्रकारिताया प्रवद्र्धन यायेगु जुइ ।
४) विश्वन्यंकंया मनूतय् दथुइ थवंथवय् मैत्रीपूर्ण स्वापू कायम यायेत व विश्वय् शान्ति, मैत्री बहाल यायेत मातृभाषा पत्रकारितायात च्वन्ह्याका यंकेगु जुइ ।
५) मातृभाषा पत्रकारिता व सञ्चार माध्यमयात राज्यपाखें माःगु संरक्षण यायेमाः ।
६) मांभाय् पत्रकारितायाया प्रवद्र्धन यायेगु लागिं मांभाय् पत्रकारिता सम्बन्धी तालिम बीगु तालिम केन्द्रत सञ्चालन यायेमाः ।
७) मातृभाषा पत्रकारिता सम्बन्धी ज्याझ्वःत सञ्चालन यायेगु लागिं आर्थिक ग्वाहालि चूलाकेगु लिसें मांभासं पत्रकारिता यानाच्वंपिं पत्रकारतय्त नं आर्थिक ग्वाहालि बीमाः ।
८) अन्तर्राष्ट्रिय मातृभाषा पत्रकारिता दिवस थीथी देय्या थीथी प्रान्तय् नियमित रुपं याना यंकेगु जुइ ।
साभार- नेपालभाषा टाइम्स
